पथरी । वाल्मीकि स्कूलले आफ्नो २७औँ वार्षिकोत्सव तथा अभिभावक दिवस भव्य रूपमा सम्पन्न गरेको छ। विद्यालय प्राङ्गणमा आयोजित यस विशेष समारोहमा विद्यार्थी, अभिभावक, शिक्षक तथा विशिष्ट अतिथिहरूको उल्लेखनीय उपस्थिति थियो।
कार्यक्रमको सञ्चालन शिक्षक मेलिना आचार्यले गरेकी थिइन्। विद्यालयका प्रधानाध्यापक चन्द्र प्रसाद दुलालले स्वागत मन्तव्य दिँदै विद्यालयको शैक्षिक तथा संस्थागत प्रगतिको चर्चा गरे। कार्यक्रमको अध्यक्षता शिक्षक-अभिभावक संघ (पीटीए) का अध्यक्ष नेत्र प्रसाद न्यौपानेले गरेका थिए भने पथरी शनिश्चरे नगरपालिका शिक्षा, युवा तथा खेलकुद शाखाका प्रमुख नवीन खुलाल बुढाथोकी प्रमुख अतिथिका रूपमा उपस्थित थिए।
विद्यालयलाई पथरी शनिश्चरे नगरपालिकाको उत्कृष्ट विद्यालय घोषणा
प्रमुख अतिथि नवीन खुलाल बुढाथोकीले विद्यालयको शैक्षिक गुणस्तर, अतिरिक्त क्रियाकलाप (ECA) र सह-पाठ्यक्रम गतिविधि (CCA) मा देखिएको उत्कृष्टताको प्रशंसा गर्दै विद्यालयलाई पथरी शनिश्चरे नगरपालिकाको उत्कृष्ट विद्यालय घोषित गरे। उनले भने, “यो कुनै आधारविहीन घोषणा होइन, विद्यालयको विभिन्न पक्षको गहन अध्ययन, तथ्य र अवलोकनमा आधारित छ।”
स्वर्गीय खगेन्द्र खनाल र स्वर्गीय शिवलाल दुलालको स्मृतिमा ५० जना मेधावी विद्यार्थीहरूका लागि पूर्ण छात्रवृत्ति घोषणा
विद्यालय व्यवस्थापन समितिका अध्यक्ष नवल किशोर खनालले विद्यालयका नीति, कार्यक्रम तथा भावी कार्य योजनाहरू प्रस्तुत गरे। यसै क्रममा कक्षा ११ का ७५ जना विद्यार्थीहरूका लागि पूर्ण छात्रवृत्ति योजना घोषणा गरियो।
२५ जना मेधावी विद्यार्थीहरूलाई विद्यालयका निर्देशक नवल किशोर खनालका स्वर्गीय पिता खगेन्द्र खनालको स्मृतिमा र अरू २५ जना मेधावी विद्यार्थीहरूलाई प्रधानाध्यापक चन्द्र प्रसाद दुलालका स्वर्गीय पिता शिवलाल दुलालको स्मृतिमा पूर्ण छात्रवृत्ति दिइनेछ। विद्यालय व्यवस्थापन समितिका अनुसार, “शिक्षा क्षेत्रमा उहाँहरूले देखेको सपना साकार पार्न तथा दिवङ्गत आत्माहरूको शान्तिका लागि यो छात्रवृत्ति योजना ल्याइएको हो।”
वाल्मीकि विद्यालयमा नैतिक शिक्षा विषय नयाँ ढंगले समावेश
वाल्मीकि विद्यालयले शैक्षिक उत्कृष्टता मात्र नभई विद्यार्थीको आचरण, व्यवहार र संस्कृतिको विकासलाई समेत प्राथमिकता दिँदै नयाँ शैक्षिक सत्र २०८२ देखि नैतिक शिक्षा विषयलाई अतिरिक्त विषयको रूपमा समावेश गर्ने निर्णय गरेको छ।
व्यवस्थापन समिति अध्यक्ष श्री नवल किशोर खनाल ले २१औँ शताब्दीमा केवल ज्ञान होइन, नैतिकता पनि उत्तिकै आवश्यक रहेको बताउँदै भने, “शैक्षिक रूपमा अब्बल मात्र होइन, राम्रो आचरण, व्यवहार र संस्कार भएका विद्यार्थी समाजका लागि अपरिहार्य छन्।”
नैतिक शिक्षाका लागि कुनै पाठ्यपुस्तक हुँदैन। विद्यार्थीको मूल्यांकन अभिभावक र विद्यालयको संयुक्त सहभागितामा हुनेछ, जसमा ५०% अंक अभिभावकले र ५०% विद्यालयले प्रदान गर्नेछन्। यो अंक प्रत्येक त्रैमासिक तथा वार्षिक ग्रेडसिट मा उल्लेख गरिनेछ।
यो पहलमार्फत वाल्मीकि विद्यालयले विद्यार्थीलाई असल नागरिक बनाउन आवश्यक मूल्य, अनुशासन र नैतिकता विकासमा विशेष ध्यान दिने प्रतिबद्धता जनाएको छ।
पुरस्कार वितरण, अभिभावक सम्बोधन र सांस्कृतिक कार्यक्रम
कार्यक्रमको अर्को महत्वपूर्ण पक्ष शैक्षिक पुरस्कार वितरण थियो। विद्यालयका उत्कृष्ट विद्यार्थीहरूलाई नर्सरीदेखि कक्षा ११ सम्म पुरस्कृत गरियो।
सांस्कृतिक कार्यक्रममा विद्यार्थीहरूले नृत्य, संगीत, र्याम्प वाक तथा विविध कलात्मक प्रस्तुति दिँदै दर्शकहरूलाई मनोरञ्जन गराए।
अभिभावक प्रतिनिधि ओमनाथ अधिकारीले विद्यालयले उपलब्ध गराउँदै आएका विभिन्न सुविधाहरूको चर्चा गरे। उनले विद्यालय व्यवस्थापनलाई शैक्षिक र अतिरिक्त क्रियाकलापलाई निरन्तरता दिँदै विद्यार्थीहरूमा सकारात्मक संस्कार विकास गर्ने वातावरण तयार पार्न आग्रह गरे।
उनले साना-तिना शारीरिक सजायका विषयलाई लिएर विद्यालयविरुद्ध जानु उचित नभएको र यसको असर विद्यार्थीहरूकै भविष्यमा पर्ने भन्दै अभिभावकहरूलाई विद्यालयसँग सहकार्य गर्न अनुरोध गरे।
विद्यालयका पहिलो र दोस्रो ब्याचका (एसएलसी २०५८ र २०५९) सम्पुर्ण विद्यार्थीहरूको स्मरण गर्दै, उनीहरूको उपलब्धिहरूको चर्चा सहित सम्मानको कार्यक्रम गरिएको थियो।
करिब ५:३० बजे कार्यक्रम समापन गरिएको थियो। यो समारोहले विद्यालय, विद्यार्थी, शिक्षक, तथा अभिभावकहरूबीचको सम्बन्धलाई अझ मजबुत बनाउँदै, बाल्मीकि स्कूललाई अझ उज्यालो भविष्यतर्फ अघि बढ्ने प्रेरणा दिएको छ।
