कोशी प्रदेश नामाकरण विरुद्व हामी आन्दोलनमा छौं। यसै सिलसिलामा किरात राई विध्यार्थी संघको सम्मेलन भयो। सम्मेलनमा भेटिएका कतिपय मानिसहरु, जो अदालती माके निकट छन, ले एउटा भ्रमपूर्ण कथा बताउने गरेको देखियो।
त्यो थियो, “गोपाल किराती प्रदेश १ को मुख्यमन्त्री बनेको भए किरात प्रदेश पक्का थियो। तर, उनले मुख्यमन्त्री नबन्नाले आज कोशी प्रदेश थोपरियो।”
यस कथाको पछाडि दुई कुरा निहित छन। पहिलो हो- भावनात्मक तुष्टिको कुरा, जसको कुनै स्पष्टिकरण जरुरी छैन। दोस्रो हो- भ्रमपूर्ण खेती, जसको प्रतिवाद एकदम जरुरी छ।
पहिचान विरोधी एमालेलाई ध्वस्त पार्ने गरि हामीले आम तयारी गरेकै हौं। २०७४ भदौ १३ गतेको विराटनगर प्रदेश पार्टी बैठकले त्यसै लक्षमा केन्द्रीत रहँदै “प्रदेश ईन्चार्ज गोपाल किरातीलाई मुख्यमन्त्री उमेदवार घोषणा गरेर निर्वाचन अभियान सञ्चालन गर्ने” निर्णय गरिएकै हो। तर, २०७४ असोज १६ गते पेरिसडाँडा बैठकमा प्रचन्डहरु उल्टै एमाले विलयमा हाम्फाल्ने भएपछि हामीले निर्णायक प्रकारको वैचारिक मतभेद राख्यौं। त्यस परिस्थितिमा एमाले घेराबन्दीको उमेदवार बन्ने भन्ने प्रश्नै हुदैनथ्यो। किनकि, एमाले विरुद्व लडेर मात्र किरात प्रदेश सम्भव हुन्थ्यो, जसको निम्ति हामीले सम्पूर्ण आँट गरेकै थियौं। तर, पहिचान विरोधी एमाले ओलीको भाँडामा पार्टी घोप्ट्याउने प्रचन्ड हर्कतबाट कसरी सम्भव हुन्थ्यो किरात प्रदेश ? खड्गप्रसाद ओलीको पाउमा लम्पसार प्रचन्ड गुटको डबल नेकपाबाट किरात प्रदेश सम्भव हुन्थ्यो भने किन भएन नेवा-ताम्सालिङ, किन भएन तमुवान, मगरात, थरुवान अनि खसान ?
वास्तविक कारण यो हो, पहिचान विरोधी एमालेको भाँडामा पार्टी घोप्ट्याउने प्रचन्ड हर्कतकै कारण आज कोशी प्रदेश नाम थोपरिएको हो न कि गोपाल किराती।
हेक्का रहोस, एमाले घेराबन्दीको मुख्यमन्त्रीमा लोभिएको भए के चाहिं निश्चित थियो भने भित्रबाट किरात प्रदेश बन्न नदिन सम्पूर्ण हर्कत गर्ने अनि बाहिर खै बनाएको किरात प्रदेश भनेर गोपाल किरातीको राजनीति नै सिध्याउने चाल चल्थे। त्यो बेला एमाले हावामा कुध्ने जनजातिहरु के गर्थे, कुरा नगरौं ।
त्यसर्थ वैज्ञानिक विचारधारा र प्रगतिशील कार्यदिशा एवं नैतिक अडान त्यागेर कुनै पद मात्र ताक्ने घटिया मानसिकताको भण्डाफोर हुनेछ । भावनात्मक तुष्टि हो भने त्यो त्यागौं र वस्तुगत राजनीतिमा उठौं । भ्रमपूर्ण षडयन्त्रको खेती हो भने त्यसको डटेर खन्डन गरिन्छ । खण्डन गर्ने वैचारिक अडान र नैतिक शक्ति हामीसित मौजुद छ ।
