नेपाल बुद्धिचाल संघ पथरीशनिश्चरे नगर कमिटीले आयोजना गरेको इन्टर स्कूल टिम चेस कम्पिटिसनको उद्घाटन असोज ४ गते शुक्रबार शिन भिलेज पार्टी प्यालेसको सभाहलमा सम्पन्न भएको छ । पहिलो दिन दुई चरणको खेल सकिदाँ एभरेष्ट इङ्लिस बोर्डिङ स्कूले सत–प्रतिशत जीत दर्ता गर्दै ४ अङ्क सहित सुरुवाती अग्रता हासिल गरेको छ । एभरेष्टले पहिलो चरणमा भूपू सैनिक अंग्रेजी स्कूल र दोस्रो चरणमा दुर्गा माध्यमिक विद्यालयलाई समान ३–० ले पराजित गरेको थियो । समान ४ अङ्क नै हासिल गरेका बाल जागरण विद्या मन्दिर दोस्रो र वाल्मीकि मेमोरियल बोर्डिङ स्कूल क्रमश दोस्रो र तेस्रो स्थानमा रहेका छन् । बाल जागरणले पहिलो चरणमा वालकल्याण माध्यमिक विद्यालयमाथि ३–० र दोस्रो चरणमा भूपूलाई २–१ ले पराजीत गरको थियो । त्यसै गरी वाल्मीकिले पहिला चरणमा मोरङ मेरिगोल्ड अंग्रेजी हाई स्कूल र दोस्रो चरणमा सिंहवाहिनी माध्यमिक विद्यालयलाई समान २–१ ले पराजीत गरेको थियो । स्वीस लिग राउण्ड रोबिन फर टिम अन्तर्गत सञ्चालित खेलमा पथरी शनिश्चरे नगरपालिका भित्र रहेका १० विद्यायलहरुको सहभागिता रहेको छ । संघको नगर कमिटी अध्यक्ष डम्बर राईको अध्यक्षतामा सम्पन्न उद्घाटन कार्यक्रमलाई सम्पूर्ण सहभागी विद्यालयहरुको तर्फबाट सुनाखरी माध्यमिक विद्यालयकी प्रधानाध्यापक भूमिकादेवी मगर, प्रदेश बुद्धिचाल संघका सदस्य रामकुमार मादेन र प्रमुख अतिथि पथरीशनिश्चरे नगरपालिकाका मेयर मोहनप्रसाद तुम्वापोले कार्यक्रम सफलताको शुभकामना दिनुभएको थियो । कार्यक्रममा नगरका शिक्षा तथा खेलकुद शाखा प्रमुख नवीन खुलाल, भू.पू. सैनिक अंग्रेजी स्कूलका प्रिन्सिपल उपेन्द्र कँडेल, वर्तमान मोरङ जिल्ला च्याम्पियन लोकसागर साम्बालगायतको उपस्थिति रहेको थियो ।
